US and Venezuela Oil Imports: अमेरिकेसोबत ट्रेड डील नंतर भारताने सरकारी मालकीच्या रिफायनरीजना अमेरिका आणि व्हेनेझुएला येथून अधिक कच्चे तेल खरेदी करण्याचा विचार करायला सांगितले आहे. मात्र खर्च, तांत्रिक मर्यादा आणि स्वस्त पर्यायी स्रोत यामुळे व्हेनेझुएलाकडून तेल खरेदीचा विषय आव्हानात्मक असून अमेरिकेने भारताच्या व्यापार करारावर एक अट घातली आहे, ज्यामध्ये रशियन तेल खरेदी बंद करण्यास सांगितले.
Oil Trade Game: अमेरिकेने भारतासमोर ट्रेड डीलसाठी एक महत्त्वाची अट ठेवली आहे, ज्यामध्ये असे म्हटले आहे की भारत रशियाकडून तेल खरेदी करणार नाहीत. याशिवाय डोनाल्ड ट्रम्प यांनी त्यांच्या टास्क फोर्सला रशियाकडून भारताच्या तेल खरेदीवर लक्ष ठेवायला सांगितले आहे. व्यापार करारातील अटीप्रमाणे भारताने रशियाकडून तेल खरेदीला ‘विराम’ न लावल्यास भारतीय आयातींवर पुन्हा 25 टक्के टॅरिफचा भार लादला जाईल आणि संभाव्य कारवाईला सामोरे जावे लागेल.
अमेरिका-व्हेनेझुएलामधून भारतात टँकर भरून येणार तेल
या दरम्यान, आता भारत सरकारने सरकारी मालकीच्या तेल शुद्धीकरण कंपन्यांना अमेरिका आणि व्हेनेझुएला येथून अधिक कच्चे तेल खरेदीला प्राधान्य देण्याचे सांगितले आहे. अशाप्रकारे, आता अमेरिका आणि व्हेनेझुएला येथून टँकर भरून भारतात कच्चे तेल येऊ लागणार आहे.
अमेरिकन राष्ट्राध्यक्षांच्या कार्यकारी आदेशानुसार, भारताने रशियन कच्च्या तेलाची खरेदी थांबवली नाही तर पुन्हा 25% शुल्क लादले जाऊ शकते. त्याचवेळी, भारत सरकारने म्हटले की देशाची ऊर्जा सुरक्षा खरेदी निर्णयांना चालना देईल आणि कच्च्या तेलाच्या स्रोतांमध्ये विविधता आणेल तसेच, आंतरराष्ट्रीय बाजारात सर्वोत्तम किमतीत तेल खरेदी करेल, ही त्यांची रणनीती राहील.
सूत्रांच्या माहितीनुसार स्पॉट मार्केटमध्ये निविदा काढताना रिफायनरीजना अमेरिकन तेलाच्या ग्रेडला प्राधान्य देण्यास सांगण्यात आले असून व्हेनेझुएलन तेलाची खरेदी व्यापाऱ्यांशी खाजगी वाटाघाटीद्वारे केली जाईल. कोणत्याही एका देशावरील अवलंबित्व कमी करण्यासाठी सरकार आयात पर्यायांचा विस्तार करू इच्छित आहे.
